Xulio Vicente González, Portavoz da Plataforma de afectados polas Preferentes de O Rosal
P: Como chegou a facerse coas participacións preferentes?
R: Realmente non cheguei a facerme con participacións preferentes, senón que me chegaron a facer coas preferentes. Pois eu, o que lle dixen ao director da sucursal bancaria, é que quería ter os meus aforros nun depósito a prazo fixo, con total dispoñibilidade e risco cero.
P: Cree que se aproveitaron da confianza depositada na entidade bancaria para venderlle estas participacións?
R: Totalmente. Non hai nada de máis valor para os bancos que a confianza dos clientes, que agora están a perder.
P: Que lles levou a agruparse na plataforma de afectados?
R: A necesidade de recuperar os nosos aforros levounos a agruparnos.
Con esta plataforma levamos, mediante a presión na rúa, a nosa problemática ante a opinión pública. Queremos acadar unha solución política que non é outra que a devolución ao 100% dos nosos aforros.
P: Vostede foi persoalmente atacado nos medios de comunicación polo Presidente da Deputación de Pontevedra, Rafael Louzan. Que ten que dicir ante esta actitude?
R: É una actitude nefasta e precaria de argumento. Claramente deixase ver, como un representante político que perde os papeis ante á sociedade, e, en lugar de situarse do lado dos afectados para así traballar nunha solución política, decide estragar o tempo con acusacións falsas sobre a miña persoa.
P: O Valedor do Pobo ven de animar á fiscalía a levar por vía penal a colocación de preferentes. Cree que iniciativas coma esta axudarán ás súas reivindicacións?
R: Evidentemente considero que o Fiscal Xeral de Galiza está a facer un traballo impecable pero, por desgraza, eu non confío na xustiza deste país pois de ser así, non desestimarían a súa demanda.
P: Os inversores de preferentes pagan quitas de ata un 70% namentres os conselleiros das caixas se xubilan con indemnizacións astronómicas. É este o mundo ao revés?
R: Que os inversores de preferentes paguen quitas dun 70%, iso a min non me preocupa, preocúpame que o teñamos que facer os aforradores. Pero volto a dicir, o roubo, eu non lle chamo quita, pois claramente é un roubo do 100% xa que o restante o canxean por “papeis”.
