Esta fin de semana as pistas pontevedresas do Centro Galego de Tecnificación Deportiva (CGTD) darán acollida á disputa do Campionato de Galicia en Marcha de aire libre á que acuden a tomar parte un total de 126 marchadores e marchadoras de toda a nosa Comunidade.

Entre a relación de inscritas destaca a participación da atleta internacional, bronce no europeo Sub23 e campioa de España Absoluta de marcha en pista, Antía Chamosa da Sociedade Ximnástica de Pontevedra, quen parte como clara favorita a revalidar o seu título autonómico. Tamén contaráse coa marchadora internacional Carmen Escaríz do Ourense Atletismo, que será outra das serias aspirantes a ocupar postos no podio sobre a proba absoluta dos 5.000 marcha.

Na categoría masculina o campión de Europa máster e campión de España na mesma categoría Juan Manuel Morales do Marineda Atlético, asume a condición de favorito ao título que xa lograra o ano pasado no mesmo escenario, ante a notable ausencia de Daniel Chamosa.

No resto de categorías participarán varios dos campións e campionas de Galicia do ano pasado, entre os cales se atopan: Ismael Díaz do C.A.Sada, Pablo Sánchez da Atlética Lucense, Andrés González do Real Club Celta, Anxo Jamardo da Sociedad Gimnástica e Antón Díaz do Atletismo Narón na categoría masculina. Na feminina, tentarán revalidar o título do 2020; Iria Rivas do Ría Ferrol, Oleksandra Kostenko da Atlética Lucense, Sabela Castelo do Vila de Cangas e Lola López do Ourense Atletismo.

E por último, na categoría máster, especial atención a Manuel Polo do Atletismo Narón como de Emilia Rodríguez do Trega, medallistas en ambos casos de varios campionatos nacionais nas súas respectivas categorías.

Etiquetas: Agenda Cultural Pontevedra,Galicia,Pontevedra